20180922

37歳のお誕生日、おめでとうございます。

2019年から音楽方面の活躍、心から祈ります。

20180415

咁就已經過咗5個月。

永遠都唔會忘記嗰朝早手震住咁打開封電郵，「轟」一聲，一片空白......從此之後，我個心好似開咗個窿咁，永遠都補唔返。

富士山登山記 – 前言

八月尾嘅時候用咗兩日一夜去登富士山。趁仲記得有幾辛苦之時要快快記得佢，如果唔係出年可能又會發神經走去登多次然後又會喺山中間感慨點解要自己要咁樣攞苦嚟辛。

本身講咗話要登山都講咗好幾年，今年終於的起心肝要成行。

決定咗8/19同20兩日之後，第一件事就係要預訂山小屋。山小屋大概四月開始就可以訂，週末同假期嘅空檔會好快冇晒，所以要訂就要趁早。本住開始辛苦啲之後攻頂就可以行少啲嘅心態，於是訂咗吉田線上最高嗰間、位於八合五勺嘅御來光館。御來光館嘅住宿有包埋晚餐同早餐，可以揀食和食或者洋食，兩餐食唔同嘢都得。睇完官網嘅參考圖片，感覺洋食好似會食唔飽咁，於是兩餐都揀咗和食。

由新宿坐去五合目嘅巴士早一個月先可以開始訂。巴士飛其實都幾快會冇晒，所以可以事前睇定啲班次，到時開放預訂時就可以快手搞掂。因為預計到時會行得幾慢，所以揀咗0755喺新宿出發嘅巴士，預計1030到五合目。

出發前一個禮拜左右就租埋啲登山道具。Yamarent個七點set（包：登山背囊連cover、鞋（仲送多對襪俾你，同埋租大0.5cm就夠，租大1cm我覺得有啲太鬆）、羽絨（唔鍾意可以揀fleece）、Gortex外殼加Gortex褲、腳套、行山枚兩支、頭燈）其實都係幾好，基本上佢俾得你嘅嘢到時都真係會同到﹔同埋租道具嘅好處你到時還完道具就一身鬆，唔使怕個喼唔夠位，又唔使擔心整到污糟晒時要點樣清潔好佢先放返落喼﹔同埋最重係Yamarent你提早去拎道具佢唔當係一日咁計，你預兩日一夜登山，你就租兩日一夜就得﹔租同還又唔使同一間店﹔假如落山嗰日還唔到又可以再多一日先還，都幾flexible。

咁當然有啲嘢都係要自己買或者準備啦：

• 保暖手套（black diamond嗰隻適合抓毛手套都幾貼手，佢聲稱最多可以頂到-7度，但如果你個人唔夠暖其實對手都會凍）
• 勞工手套（途中要攀吓石，都真係有需要的）
• 快乾tee（其實都唔使帶多件替換，上到山凍冰冰又攰你都唔會想郁）
• 羊毛襪（都係啦，到時冇力替換㗎喇，都唔使帶多對）
• 多用途圍巾（用嚟圍住條頸保暖又得，用嚟當頭巾包住個頭又得，太大塵拎嚟包住個嘴都唔錯）
• 水袋（有條管真係方便好多！另外，作為一個平時要飲好多水嘅人，其實2公升嘅都會夠，上到山要飲水都幾費力，同埋到時都唔會點樣想飲水）
• 太陽眼鏡（朝早太陽都幾猛，戴咗唔使到時瞇起對眼行）
• 防曬（同上啦，小心會曬傷）
• 潔面濕紙巾（去完廁所拎嚟抹手都好丫，同埋早晚抹一抹塊面會舒服啲）

另外關於要換幾多100円銀仔，真係會用到100円嘅都係去廁所嘅時候（通常會收你200-300円維護費），燒印啲檔全部都有錢找嘅，所以都唔使留返太多。